Hérna. Dagurinn í gær var svakalegur! Og þessi verður ekki síðri.

Dagurinn hefst á föndurstund fyrir 4-6 ára í Grunnskóla Húnaþings vestra. Ókeypis.

Föndurstund heldur svo áfram kl. 11:00 fyrir 7-12 ára. Líka í Grunnskóla Húnaþings vestra. Ókeypis.

Heimsmeistaramótið í Kínaskák verður í Félagsheimilinu Hvammstanga milli kl. 12:00 og 15:00. Óskað er eftir því að fólk mæti tímanlega, uppá skráningu, en best væri ef fólk myndi skrá sig á uppvakning@gmail.com eða mela5vegur@gmail.com. 2.500 kr. þátttökugjald – innifalið kaffi og rjómavöfflur. Spiluð verður einstaklingskeppni þannig að það þarf ekki að vera skráð lið. Veitt verða verðlaun fyrir fyrsta, annað og þriðja sæti.

Kastalar leiktækjaleiga eru að koma sér fyrir núna við Félagsheimilið Hvammstanga og verður með opið milli kl. 13:00 og 18:00. Með í för verða svo matarvagnarnir Dons Donuts og Bumbuborgarar en þeir ætla að steikja ofan í gesti dag og nótt.

Einnig kl. 13:00 verður Mocktailnámskeið á neðri hæð Félagsheimilisins Hvammstanga. Fullt er á námskeiðið og 13 ára aldurstakmark.

Einnig kl. 13:00 verður fyrsta hlaupið ræst af stað í Vatnsnes Trail Run. Fyrst er það fjölskylduhlaupið. Ræst er frá Félagsheimilinu Hvammstanga. Glaðningur í lokinn.

20+ km hlaup Vatnsnes Trail Run verður ræst frá Félagsheimilinu Hvammstanga kl. 14:00. Vegleg útdráttarverðlaun verða veitt og einnig verðlaun fyrir efstu þrjú sætin í karla og kvennaflokkum. Léttar veitingar að hlaupi loknu.

10 km hlaup Vatnsnes Trail Run verður ræst frá Félagsheimilinu Hvammstanga kl. 15:00. Vegleg útdráttarverðlaun verða veitt og einnig verðlaun fyrir efstu þrjú sætin í karla og kvennaflokkum. Léttar veitingar að hlaupi loknu.

KurtHeisi verður með DJ-námskeið í Félagsheimilinu Hvammstanga frá kl. 15:00. Aldurstakmark er 13 ár og skráningar fara fram hér. Ókeypis.

Miðasala fyrir tónleikana í kvöld og Skítamóral annað kvöld opnar kl. 16:00 og verður í Félagsheimilinu Hvammstanga, efri hæð. Í boði eru 100 miðar á hvorn viðburð. Málið er samt að aðeins er hægt að kaupa tvo miða per viðburð á mann. Hver miði á 8.000 kr.

Kokkað með Patta og Valla verður milli kl. 16:00 og 17:00 við útigrillið á tjaldsvæðinu í Kirkjuhvammi.  Tilvalið fyrir alla fjölskylduna, börn verða að mæta í fylgd með fullorðnum. Aðeins 18 pláss í boði. Skráningar eru hér. Ókeypis.

Púttmót Flemmings verður við heilsugæsluna á Hvammstanga kl. 16:00. Eins og venjulega er keppt í unglingaflokki stúlkna og drengja 16 ára og yngri og síðan í flokki 17 ára og eldri kvenna og karla. Leiknar er 2 x 18 holur. Þrír fyrstu í hverjum flokki vinna til verðlauna. Ekkert þátttökugjald – bara mæta.

Viðburðurinn Perlur og vín hefst kl. 16:00 og verður á neðri hæð Félagsheimilisins Hvammstanga. Athugið að á þennan viðburð er 20 ára aldurstakmark. Verð er 1.000 kr. og drykkur innifalinn.

Kl. 18:30 er svo komið að kvöldvöku í Kaupfélagsportinu. Þar fáum við matreidda tóna m.a. frá Gugusar, Herberti Guðmundssyni og XXX Rottweiler og matreidda ofan í okkur kjötsúpu. Ókeypis.

Lokahnykkurinn er svo tónleikar í Félagsheimilinu Hvammstanga sem hefjast kl. 22:00. Þar koma fram Herbert Guðmundsson, XXX Rottweiler, KurtHeisi og BigSexy. 18 ára aldurstakmark og Eldsbarinn á staðnum.